María Rivas expresa o respaldo do Goberno ao sector pesqueiro coruñés fronte á implantación de 87 zonas de veda en augas comunitarias
30/09/2022
“O Goberno de España está co noso sector pesqueiro. Solicitamos á Comisión Europea a suspensión da prohibición e faremos todo o necesario para defender os intereses do país”
A subdelegada do Goberno na Coruña, María Rivas, participou esta mañá na lonxa da Coruña nun acto de apoio ao sector pesqueiro, organizado polos armadores coruñeses, fronte á decisión da Comisión Europea de implantar 87 zonas de veda en augas comunitarias. A subdelegada referendou a postura do Goberno xa comunicada polo ministro de Agricultura, Pesca e Alimentación, Luís Planas. “O Goberno de España está co noso sector pesqueiro. Solicitamos á Comisión Europea a suspensión e a revisión da prohibición de pescar en augas profundas e faremos todo o necesario para defender os intereses do país”, manifestou María Rivas.
María Rivas transmitiu aos armadores a súa solidariedade co sector e reafirmou o compromiso do Goberno coa defensa dos intereses do país. No acto estiveron presentes tamén representantes institucionais como a alcaldesa, Inés Rey, e o presidente da Deputación, Valentín González Formoso, quen *visibilizaron co Goberno unha defensa unitaria da pesca coruñesa.
España trasladoulle á Comisión Europea que o regulamento non recolle a mellor información científica dispoñible. Así, en relación coas zonas de pesca, a medida da Comisión ten moito maior alcance que o que indica o informe do Consello Internacional para a Explotación do Mar (ICES). E sobre as artes que se prohiben, como o palangre de fondo ou as redes de *enmalle, o ministro de Pesca advertiu a Bruxelas de que en ningún modo foron obxecto de consideración no informe do ICES. O Goberno manifestou a súa decisión de tomar todas as medidas ao seu alcance para defender os dereitos do sector pesqueiro español.